الشاعر على عبد العزيز
حصل الشاعر الصديق العزيز " على عبد العزيز" على عضوية إتحاد كتاب مصر و أردت أن أبعث له بتهنأه على طريقتى
القصيده الأولى للشاعر على عبد العزيز من ديوان طالع يغنى
(ولد)
ولد كأنه نجمايه
محوط نهر على ضهره
و شايل شمس ف جيوبه
يبعترهم على الورقه
فتطرح دنيا مختلفه
بسؤال مبهم
و جوابه رد متعلَّق
***********
القصيده الثانيه من نفس الديوان
(شجر الأغنيات)
ساعات أبات
و بوابات الحلم
مفتوحه
ألقاك هناك
زارع شجر شعر البنات
و مضفره
نسمة عصارى
تعفَّره
على صحن فضه
يتعكس صورة ملاك
لسَّاك
بتقدر تنكسر
و الروح ثبات
لا ذكريات الدوامات
بتغرَّقك
و تفرَّقك
حدوته عن شاطر ما خاب
لا خبى صوته ف السكات
و لا شد ع الوتر النشاز
ف نشيد مديح الأوليه
و لا زاحم
الصف الأخير
م الأبريا
و لا كان سواك
لساك هناك
تزرع شجر الأغنيات
و تضفَّره
ف شعر البنات
**********
القصيده الثالثه من ديوانه الثانى نعى الغلابه لبعضهم
(عيون حبيبتى)
عيون حبيبتى وساع
من الحبايب تساع
قد ما تقدر تعد
تبنى .. و لا بتهد
ف العشق صاحبة مهاره
لا مالكها ساكن مغاره
و لا له عصابه ف قصر
سابقه التاريخ و العصر
يا شهرازاد مسرور
سيفه ماهوش مسلول
إلا على عِداكى
لا شفت فيكى ضنى
و لا فقير باكى
و سندبادك مسافر
عشق ف الترحال
لا من ضنين الأسى
و لا دوشة الأهوال
***********
القصيده الرابعه من نفس الديوان
(تاتا ورا تاتا)
تاتا ورا تاتا
يا قلبى بزياده
العتبه .. خطينا
قلنا و غنينا
ليكى السبع حكايات
و تعلبك لو فات
هيغرَّق الدبَّه
ف النهر و لا البير
أنا ف الحكايه غفير
قابض التمن دنانير
و ماجيدى م الفضه
الفجر نتوضى
و الفرض يتقضَّى
و تكمله السنه
جدى اللى كان بنَّى
بنى قلعه للناصر
و سور كبير واصل
باب الفتوح بالنصر
و مزوقك يا مصر
بالخان و بالأزهر
تأمل المنظر
...........
الخيل سنابك تعفَّر المشربيه بغبار
مقدمين الدَرَك ولسم مع الشطار
و سنقر الكلبى
قافلها سوق ورا سوق
عرق الجبين مسروق
و المحتسب بيعد
عدد الليمون دراويش
بيترضوا الحرافيش
و بيمنعوا العامه
م الحضره و الجنه
وارثين مفاتيحها
من اللى فاتحها
غدرك فصل يا سليم
الجثه عن راسها
زى الحسين بتقيد
و تغيظ ف حراسها
حسن يا راس الغول
الحبل مش مفتول
و ابنك على ف السيرك
يشبه أغا من الترك
نسُّوه ملاعيبك
و رقصّوه ع السلك
تفرح به الخواجات
تدفعله بالألوفات
تمن اللى جىّ و فات
************
ألف مبروك يا عم على
posted by هيثم محفوظ at 11:24 AM
7 comments
