كلام بكره

القمر أبو شعر شايب قامت ف دماغه و حب يغيَّر

سبغ شعره بصبغه ليلى و ضفَّره ..

ضفاير طويله طويله لغاية ما وصلت لكتاف الشجر

و بلدنا كل ليله تحت الضفاير تمارس الخطيئه مع ديُّوس شكل

ولاد البلد . من أب تانى .. سيَّفو ضمايرهم ع الشرايح و بيدو لبعض مزدات

مع إن الدقيقه بتلاتين قرش

و لكل قرش حكايه .. و كل قرش بيفتح ف الغيب زقاق

و من زقاق لزقاق لزقاق لما توصل للغوريه

تلقى جدران التاريخ صفحات المشربيه

و تلقى الغلابه اللى بحقيق قاعدين جواها عاملين دواير !!

كأنهم ف إعتصام .. ده مش كلامى أنا ده كلام بكره

و يا سلام يا ولد لما ترجع تانى المشربيات مئوى و سبيل

و النوايه ترجع تسند تانى الزير

و الشباب العجوز يصغر .. و حلمه من كتر ما بيتحقق

يرجع تانى يكبر .. و يصغر .. و يكبر

يمكن يمد إيديه من وسط البلد لحدودها

يمكن يبطل يدِّى لبعضه مزدات

يمكن تبطل أكياس المناديل تبيع نفسها ع القهاوى

يمكن .. و يمكن .. و يمكن

مليون يمكن .. حبلت فيهم الكواليس

***************************

جديد على ستديو صبا

studiosaba.blogspot.com