طريقى
أحب قوى غنا الناس،أحب أغنى لهم و أعبر عن كل مشاعرهم و كل أحاسيسهم و كل العقبات اللى بتقف فى طريقهم و تحقيق أحلامهم،مش معنى كده إنى ما بحبش الغنى العاطفى،بحبه و كل حاجه بس ما أحبش يكون مسيطر على كل حالات الغنى اللى فى الدنيا
فى الحقيقه أنا ما كنتش واخد بالى من ده قوى بس من سبع سنين بالظبط قابلت صديقى الشاعر على عبد العزيز كان عمرى 19 سنه تقريبا و فى الحقيقه بدأ يسمّعنى ناس كتير من الشيخ إمام أحمد إسماعيل محمدعزت و زى ما أكون أنا كنت بتلكك لاقيت نفسى حسيت السكه بسرعه قوى بكل أفكارها و كل توجهاتها بدأت أنا و على نشتغل و نجرب فى سكك كتير لغاية ما عملنا أغنيه إسمها فجرنا الأخضر و بدأنا نشتغل بجد أنا لقيت شخصيتى و هو لقى سكته
صدر لعلى عبد العزيز ديوانين الأول بعنوان طالع يغنى و التانى نعى الغلابه لبعضهم
على فكره نصوص كتير من الديوانين لكل الأغانى هتبقى على الموقع اللى هنشره اليومين دول
الشاعر محمود عبد الباسط
محمود عبد الباسط شاعر من بنها و اتعرفت على شعره و لحنت له قبل ما أشوفه أنا شايف إنه شاعر رقيق جدا و له إحساس مختلف بالحاجات اللى بتحصل فى الدنيا و هو برضه له ديوانين دموع حضرتك و يدوب تلحق
على فكره أنا عامل لينك لموقعه
____________________________________________________
أنا عامل أربع لينكات لأربع أغانى مغنيهم فى مشروع ألبوم نقيت فيه مجموعه من أغانيه للشعراء على عبد العزيز و محمود عبد الباسط و أمجد القهوجى و الأربع أغانى دول هما الرمان و عيون حبيبتى لعلى عبد العزيز و بيكيا و ساب الجنينه لمحمود عبد الباسط
ملحوظه سمعت إن الأغانى هتعد شهر بس من تاريخ الأب لووود و انا عملت الأب لود ده 11/9/2006
ملحوظه2 الأغانى نازله mp3 لأنى ملقيتش برنامج يحول لريال بلاير
فالأغانى تقيله شويه فمتيأسوش بسرعه
posted by هيثم محفوظ at 12:15 PM
14 Comments:
هيثم
:)
بجد انا بحب الشعر والكلام الحساس حتى لو مش كان شعر بس كلام يكون حساس ويلمس القلب
وتحياتى وربنا يوفقك
شــــرين
جميل
عقبال يارب ما تلحن لي
عزيزي هيثم
اولا احييك علي جهدك الرائع
ثانيا ان لست من هواه الاغاني ولكني بحب الشعر جدا
فرجاءا منك ان تنزل كلمات الشعر علي الموقع
وربنا معاك
هيثم
حلو انك بتكون لنا عين على الحركة الفنية والأدبية فى قطاع مهم منطقة وجه بحري والدلتا
وربنا يوفقك
بس انت ما زرتنيش
وانا اللى حرصت ازورك تانى واحد
وجبت فى إيدي كام لفة سكر وشوية فاكهة وصندوفين ببس
كنوع من المجاملة كعادة الصعايدة يعنى
تحياتى
وزورنى وما تكلفش نفسك
هاااااااااااااههههههه
مين ملحّن؟ و مين سوليست العود؟
هيثم انت هتدفعلي فاتورة التليفون انا فضلت ساعتين انزل في الحاجات وخايفة افتح اي لينك تاني لا الكومبيوتر يغمي عليةوبرضة مانزلتش طب اسيب كومينت علي حاجة ماسمعتهاش ؟
شرين
بصراحه يا جميل أنا مافهمتش من تعليقك إذا كنتى قدرتى تنزيلى الأغانى و لا لأ على العموم أنا مبسوط قوى إنك زورتينى لتانى مره و معلش لو الأغانى تقيله شويه فى التنزيل ما تيأسيش بسرعه و حاولى تسامعيها لساسو
فى النهايه خليكى متابعانى و ربنا يقدرنى و أخلى مدونتى حاجه محترمه
آدم المصرى
بجد مبسوط قوى من زيارتك دى اللى جت بعد زيارتى ليك على طول بجد أنت حد محترم قوى و من الناس اللى مديين للبلوجز قيمه خليك متابعنى و يا باشا ربنا يسهل ما حدش عارف ممكن ألحنلك فى أى وقت قتريب
خش على محمود عبد الباسط من اللينك اللى عامله على المدونه و أنا هاكون دايما عندك سلام يا معلم
محمد مفيد
يا صحبى يالمدون الوحيد اللى سمعت صوته كل الأشعار بتاعت على عبد العزيز هتبقى نازله فى الموقع أما بالنسبه للأغانى فأنا هكتب معظمها فى المدونه
ألا م الحق أنت بقى نزلت الأغانى و لا لأ؟
سلام
أبو أمل
أنا بحبك قوى و بجد العين اللى إنت بتتكلم عنها و اللى هى مرايه للحركه الفنيه و الادبيه ف وجه بحرى دا كان واحد من أهدافى فى عمل المدونه دى،أنا مش هاسألك نزلت الأغانى ولا لأ بس حاول تخش على موقع محمود عبد الباسط من اللينك اللى أنا عامله على المدونه لموقعه و يا باشا مدونتك هى مدونتى يعنى أنا لما هاجيلك مش هازورك دا أنا بشوف واحد من أهلى عامل إيه بس
g
مبسوط قوى إنك زورتنى و نزلت الأغانى
الملحن يا عم و سولست العود هو العبد لله ياريت تتابعنى و خصوصا لنا ها أكتف الموقع بتاعى ،بجد أحب اسمع رأيك فى كل الشغل
saso
والله يا شموسه حاولت ألاقى بنامج يحول لريال بلاير و مالقتشى حاولى تنزليهم من أى سيبر بقى و خلاص
بجد حابب أسمع رأيك بجد بجد بجد
و أنا موصى شيرين إنها لو نزلتهم تنزلهملك أو تسمعهم لك
مساء الفل يا ابو الثوم ،احلى تحية واحلى مسا على احلى مدونة على النت
ويارب الدنيا كلها تسمع صوتك وتسمع الحانك وتاخد بالها من دماغك فى اختيار الكلمات،ويمكن دة يكون فى يوم من الايام بداية التغيير فى دنيا الموسيقى الحالية اللى مجدش عارف هي هدفها ايه باظبط
اخوك شريف محفوظ
هيثم باشا
مساء الجمال... انا متشكر اوي علي مرورك الجميل عندي
عايزين نتواصل اكتر
طلعت عيني وبرضه مش عايزه
اعمل ايه؟
cortex
أنا اللى متشكر قوى لتلبيتك السريعه فى زيارتى و أنا اللى بقولك عايزين نتواصل أكتر،حاول تنزل الأغانى و ياريت أعرف رأيك .. تابعنى
محمد مفيد
حاول تنزلهم من مكان السرعه فيه عاليه و أنا بحاول ألاقى برنامج يحول لريال بلاير علشان أقلل المساحه
و سلام
السلام عليكم
فنان جميل .. صبور .. بيحب موهبته .. حساس .. صوت رائع و خلاب
جميله جدا جدا اول اغنيه يا هيثم .. حقيقي روعه ...
انا نزلتها بعد يومين من لما كنا علي قهوة الكرنك .. و بجد عجبني صوتك و ادائك واحساسك و عزفك علي العود ..
ان اهبذل كل جهدي عشان اساعدك ان شاء الله .. احنا زملاء في الفن و لازم نحافظ علي فننا عشان الاصل هو اللي بيفضل يا هيثم
تحياتي
مودي راب
متشكر قوى يا مودى على الكلام الجميل اللى إنت قولته فى حقى و الكلام ده ما يخرجش إلا من فنان بجد
تابعنى على المدونه
و تحياتى
الاغانى جميلة جدا ,للامام دايما ان شاء الله.
Post a Comment
<< Home