Sunday, October 15, 2006

صدقونى مش مهم

فى البدايه البوست ده ماكانش فى الحسبان خالص بس اللى حصل يوم الجمعه كان لازم يتوضح و لو أنا غلطان فى حاجه ياريت تقولوا لى ،اللى حصل إن عبده الزراع الشاعر و اللى كان بيدير الندوه قبل حضور الشاعر أحمد عبد المعطى حجازى كان زى النسمه مدينى و قتى و كنت بغنى أكتر من غنوه فى الفقره الواحده و بجد كنت مبسوط قوى لوجود أبو الفتوح لأنه كمان كان هايشاركنى فى فقره من الفقرات و بصراحه كده كنت أنا و أبو الفتوح و على عبد العزيز بنحلم باليوم ده و لكن اللى حصل بعد حضور الشاعر المبجل المحترم أحمد عبد المعطى حجازى تحول عبده الزراع إلى كائن جبلى غبى ، بدأت لهجته تتغير فى الكلام معايا ، بدأ يخلى شعرا يقولوا أكتر من نص و نصين لأن حجازى عايز كده حتى البراشوت زهره العطار خلاها تغنى غنوتين ف أول فقره و خلاها تغنى تانى علشان من حول حجازى عايزين كده و الجميل إن كل ده حصل بعد ما قال لى مافيش حاجه بمزاجك أنا اللى بدير الندوه ، نسيت أقول لكم إن زهره كانت ضيفه زيها زى أى حد و الغريبه إن يوم 11 إستأذنت منى أما يوم الجمعه لقيت عبده هو اللى بيقول لى فحسيت إن إحترام حجازى بقى على حسابى و الغريب إنى لما كلمت الشاعر عزت إبراهيم و هو المسؤل عن واحة الشعراء كلها قال لى بالنص " ما تلومش عبد الزراع ف يوم جاى فيه حجازى لأن لو حجازى زعل تانى يوم هنلاقى الوزير على دماغنا"
حقيقى ماعرفتش أقول له إيه ، بدأت أحس إن نزولى جه فى الوقت المناسب لأنى حسيت بإهانه كبيره قوى لكرامتى ، يمكن أكون غلطان بس أنا شوفتها كده ، لو كنت إتكلمت فى الميك أو أعلنت عن موقفى بشكل وحش كانت الناس العاديه هاتاخد منى موقف ، الناس مالهاش إلا اللى فى الظاهر ، مين المغنى ده اللى جى يغنى بزعيقه؟ بس صدقونى ده مش مهم المهم و اللى زعلنى كان نفسى أبسط كل الناس اللى جولى و اللى ماكانوش يعرفونى و اللى كان نفسى يعرفونى فى ظرف أحلى من كده ، و اللى زعلنى كمان نظرة عتاب من ساسو و هى بتقولى "ينفع تنزل و تسيب حفلتك
أنا ما زعلتش منها أنا زعلت من الموقف كله على بعضه ، الجميل إن ربنا ألهمنى بسرعه و بمساعدة أبو الفتوح إن اللى لازم يحصل حاجه من الإتنين
يا اللى متضايقين عشانى يعملوا شكل إحتجاجى أمام القائمين على الندوه أو نعمل ندوتنا بره على باب الواحه و الجميل إن التانيه حصلت و بسرعه ، مش قادر أقول لكم كنت حاسس بإيه و انا بغنى ف وسطكم ، بغنى قدام أجمل تلات قمرات ممكن أى إنسان يعرفهم فى الدنيا : صفاء و شرين و مروه و أجمل شمس ممكن الواحد يعرفها : الواد آدم و شوية النجوم اللى كانوا معاه ، صدقونى الشمس ليها نجوم زى القمر بالظبط
بجد مش عارف أقول عليكوا إيه ، و الله مانا لاقى كلام أقوله إنما بالتأكيد أنتوا أكتر من الأصدقاء بشويه حتى دعاء غريب لقيتها بعتالى أم أحمد زميلتنا فى المدونه اللى جنبى بس مع الأسف جت و البراشوت بيغنى
الجميل و تقدروا تعتبروا ده خبر إمبارح بس كلمت آدم و بدأنا نتفق على حفله فى ساقية الصاوى قريب جدا إن شاء الله بعيد عن كل الضغوط و كل القرف و كل التملق و كل النفاق
خليكوا دايما جنبى ، مش عايز أنسى أشكر صفاء أو أختى صفاء للمره التالته و الرابعه و الخامسه على المجهود اللى عملته معايا فى الحفلات دى
بحبكووووووووووووووووووووووووووووووووووووووووووووووووووووا
آه قبل مانسى الواد أبو الفتوح كان عايز يقول حاجه .. قول يا عم
معاكوا أبو الفتوح
الفنان أهم حاجه عنده كرامته ، يمكن يكون اللى حصل يبان دفاع سلبى عن الكرامه بس أنا ماكنتش عارف إزاى هيثم هايقعد باقى الحفله على المسرح من غير ما يفتح بوقه و بعدين الدفاع الإيجابى جاى فى السكه
صفاء .. ليه عندك علبة كانز و هاشربها يعنى هاشربها
شرين و مروه نورتونى
آدم بحبك
كان نفسى قوى قوى قوى أطلع كل اللى عندى و أقرب منكوا أكتر و اكتر بس .. و لا بس و لا حاجه كله جاى
و بإذن الله هانعمل حافله جامده جداااااااااا
كتبتلكوا كل اللى عايز أقوله ف قصيده على مدونتى
و أحلى سلاااااااااااااااااااااااااااام

13 Comments:

Blogger Mody Rap said...

هي الحفلات دي فين يا هيثم انا عايز ابقي اجي يا اخي ههههه

مودي راب

15/10/06  
Blogger يا مصر اكتب إليكي رسائلي said...

يارب افتكر اللي كتبته كان من القلب وبدون تفكير ، بس التوقيع اني بعرف اقرا واكتب اللي تحت دا هو اللي أكيد لغى التعليق وخلاني اعيد تاني
الأخ العزيز هيثم
تحياتي لك ولابو الفتوح ..
انت ناجح وكان من الضروري محاولة ابعادك عشان ما يكونش في مقارنه بينك وبين حد قد لا يرتقي الي فنك ..لكن انت ليك جمهورك أكيد ، والدليل الشموس والأقمار والنجوم اللي كانت بتلالي حواليك .. وكلام تاني كتير كنت قلته وراح ها حاول ارتب افكاري تاني وارجع اقوله .. اعمل ايه بس التعليق الأولاني احتفي عشان التوقيع بالكود اللي تحت ده.. النصيب

15/10/06  
Blogger ادم المصري said...

معلشي يافنان

دي ضريبة الديكتاتورية

وهي دي ضريبة الفنان الجيد

16/10/06  
Blogger moorgen said...

هيثم
:)
اولا قدر الله وماشاء فعل
وماتزعلش ولا محمد كمان يزعل
الحمد لله
وبصراحة انا اصلا زهرة دى مش نازلالى من زور وانا قولت مش عجبـــــانى
وخسارة فيها الكلمات واللحن
بس معلش بقى
المهم من دا كله انت ومحمد بجد
انا مبسوطة بمعرفتكوا

هيثم هيثم
ممكن اطلب منك طلب
انا عايزة كلمات الاغنيه اللى غنتها الحلوة
اللى بتقول فيها مش هو دا ضحكى ولا هو دا بكاى
وعلى رأى محمد
احلى سلالالالالالالام

16/10/06  
Blogger مـحـمـد مـفـيـد said...

اخويا وحبيبي هيثم
اخبارك ايه معلش يا نجم لازم يحصل اختبارات لك في البدايه لمعرفه مدي صبرك وتحملك ولا تنسي انه من صعد سريعا هبط سريعا
وبعدين اللي عملتو صفاء وشيرين فعلا البنات دول امتر من الاخوات وهم بنات بس رجاله بجد

17/10/06  
Blogger saso said...

سبحان الله فعلا الحفلتين اللي قبلهم كان الناس اهدا.. كل الشده دي علشان جه ضيف.. صحيح هو احمد عبد المعطي حجازي شخصيا بس في حاجة اسمها بروجرام مطبوع عليه اسمك.. وميرسي ليك اصلا انك قدمت زهرة معاك
انا اسفة مووووت لو كلامي ضايقك بس فعلا مادام حفلتك وكلنا جايين ليك كان لازم تستني عارف ليه
الموقف قصاد الناس مش واضح غير انك انسحبت لما اتطلبت زهره
فاهمني.. احنا عارفين وفاهمينك لكن مش كل اللي موجودين احنا

مجرد سؤال .. انت بتقدم صوت زهره يعني مقتنع بيه؟
سؤال تاني... علي عبد العزيز ليه كان مطفي اول يوم كان رائع .. سلملي بجد علية
اةة .. محمود عبد الباسط مجاش لية ولا مره ؟
مش كل مره بقي هاقوللك انك رائع واني فرحانة جدا اني سمعتك وشفتك.. بجد انت في الحقيقه كمان جميل زي صوتك واغانيك او ممكن اكتر

17/10/06  
Blogger هيثم محفوظ said...

مودى راب
إزيك يا جميل ، أنا عارف و الله إنى مقصر فى حقك بعدم زيارتى لمدونتك لحد دلوقتى بس أكيد إنت عرفت ظروف الحفلات و الإنشغاله اللى كنت فيها ناهيك عن ضيق وقت رمضان ، الحفلات دى يا باشا بتنظمها الهيئه العامه لقصور الثقافه و مسامياها ليالى المحروسه و دى مكانها حديقة السيده زينب أمام مستشفى الحوض المرصود و الحمد لله الواحد أبلى بلاء حسنا ، أخر يوم بس اللى بليت بلاء من غير حسن
يا مصر أكتب ....... :)
يا عم أنا عارف حظك معايا وحش أول مره دخلت عليك لقيتك عامل بوست خاص بموضوع الأخ المسيحى ده و دخلت عليه من غير ما أمسى عليك سامحنىىىىىىىى
عارف اللى ضايقنى بس حالة النشوه اللى كانت عندى و اللى فسدت بسبب اللى حصل و خصوصا قدام نجوم و شموس كان نفسى تبقى منهم , مستنيك فى حفلات تانيه و مش عايزك تقلق الواحد ما بيتعلمش ببلاش
آدم المصرى
و الله يا عمنا أجمل حاجه حصلت يوميها هو اللى إحنا عملناه على باب الواحه و بجد الواحد قرب منك بسرعة مليون سنه ضوئيه فى اليله ديه ، سلملى على كل الشباب اللى كانوا معاك
شيرى
اللى بقت صوت و صوره
أشكرك على الكلام الجميل ده و انا عارف إن مافيش شكر بين الإخوات بس معلش إستحملينى الفتره دى
صدقينى زهره كانت حاجه كويسه بس إستعدادها لحاجات كتير ملهاش لازمه و عرق النداله اللى طافح فيها هى اللى إدتك الصوره دى
بالنوسبه للكلمات فدى كلمات على عبد العزيز بس أنا مش عارف أبعاتهالك على الإيميل و لا فين
أشوفك قريبا فى ظروف كويسه و علش يا ابو الفتوح أجمل و أحلى سلااااااااااام
محمد مفيد
الأول أخبار اللى فى بنها إيه
سلامى ليهم كلهم
معاك حق يا محمد بس اللى زعلنى كل الناس الجميله اللى كانت موجوده دى كان نفسى تسمعنى بشكل كويس بس إنت معاك حق من صعد سريعا هبط سريعا
المهم كان نفسى تكون موجود بس علشان تتعرف بأبو الفتوح (ههههه أنا ) و مورو
أكلمك ع العيد إن شاء الله و بوسلى الواد
ساسو
يا شموسه أنا و الله ما زعلت منك أنا زعلت من الموقف كله على بعضه أنا يمكن زعلت إن أنا زعلتك
بجد أنا أول مره أتحط فى الموقف ده و لنفس السبب اللى إنتى قولتيه أنا إنسحبت صدقينى لو كنت أعلنت عن موقفى بشكل وحش و ده غصب عنى كان هيحصل كانت الناس اللى ما تعرفنيش هاتاخد منى موقف حقيقى وحش فانا قولت أنزل حفاظا على كرامتى من وجهت نظرى و أسيب كل اللى عايز يفهم يفهم
اللى عايزه
(هو انا كده إنهزامى؟)
بالنسبه لصوت زهره أنا بقدمه عشان العيش و الملح ، كنت مقتنع بيه زمان طبعا دلوقتى لأ و على فكره على عبد العزيز هو اللى عرفها أول يوم بميعاد الحفله على إعتبار إنها صديقه يعنى و أنا ماكنتش موافق عشان عرق النداله إياه كان أكيد هايشتغل
أما بالنسبه لعلى كان مطفى زى ماكنت أنا مطفى فى الربع التانى من الحفله
زى ما شفتينا كده بيبان علينا بسرعه
بس هوه ده السبب و سلامك ها يوصل له يا جميل
بالنوسبه لمحمود فهو ما بيردش على المحمول من أول رمضان تقريبا النداهه ندهتله على العموم هاحاول معاه تانى
سلميلى قوى على مورو و خدى بالك من نفسك

17/10/06  
Blogger moorgen said...

هيثم
:)
ازيك يا جميل
وبالنسبه لكلمات الاغنيه ميرسى لاهتمامك
وابقى مشكوره جدا لو بعتهالى على الايميل
shosho_ hanafy@hotmail.com
وسلامى لمحمد ابو الفتوح
وسلالالالالالالالام يا جميل

18/10/06  
Blogger دعاء غريب said...

أزيك يافنان
طريق النجاح دايما مفروش بالمصاعب بس في الاخر ربنا بيكرمنا ويدي كل واحد نصيبه
بلغني من بنت عمي العزيزة سحر انك انسان جميل قوي وصوتك وعزفك رائع
فمتخليش اللي حصل ده يهز شعره منك
انت تستاهل كل خير وان شاء الله حفلة ساقية الصاوي تكون احلي حفلاتك باذن الله
واودعك اني هاجي
بكل احترامي وتقديري ليك ياصديقي
دعاء غريب

18/10/06  
Blogger يا مصر اكتب إليكي رسائلي said...

يشرفني ان اتقدم بخالص التهاني وأطيب التمنيات القلبية بمناسبة عيد الفطر المبارك اعادة الله علينا وعليكم وعلى مصرنا الحبيبة بكل خير .. مع خالص تحياتي وكل عام وانتم والأسرة الكريمة في أسعد حال

19/10/06  
Blogger هيثم محفوظ said...

moorgen
يا باشا لا شكر على واجب عقبال ما تطلبى منى حاجه كبيره كده و أقدر أعملهالك سلميلى على مورو الدماغ و ساسو الشموسه و خدى بالك من نفسك
أبو الفتوح : الله يسلمك
دعاء غريب
متشكر قوى لكلامك الجميل و شعورك اللى كتير عليا ، أنا عارف و الله إن طريق النجاح مفروش بالصعاب بس يمكن اللى دايقنى شويه إن كنت محقق نجاح فى أول ليلتين و جيت فى التالته و حسيت إن الدنيا كلها بتلعب ضدى لولا بس شوية الملايكه اللى كانوا حواليه اللى كانت من ضمنهم سحر هما دول اللى بجد خلونى أستقبل الصدمه تقريبا بأعصاب هادئه ، بجد أحب أشوفك و مبسوط جدا جدا بصداقتك و معرفتك ، أول ما تتحدد حفلة الساقيه هابلغك على طول
يا مصر .....
و انت طيب يا عم ، هازورك و الله قريب

20/10/06  
Blogger sahar said...

معلش يافنان تعليقي اتاخر لان الكمبيوتر بايظ عندي
انا كنت في الحفلة وماحدش يقدر يغلطك انا بجد أتغاظت من المذيع وقلة ذوقه
الصراحة ماينفعش لا في شعر ولا في اذاعة عمري ماشفت كدة ابداً بس اللي عجبني بجد هو إلتفاف اصحاب المدونات حواليك بجد حسيت اننا أسرة وقد أيه قريبين من بعض وبنخاف علي بعض وحسيت كمان اني مسنودة بناس ذي الفل لو يوم جارت الايام عليا هاألاقي حد يقف جنبي بجد بتمني اننا نفضل أصحاب علي طول

أم أحمد

11/11/06  
Blogger IRC President said...

مفيش أخبار عن ساقية الصاوي؟

19/11/06  

Post a Comment

<< Home