Tuesday, October 31, 2006

وجيه عزيز


www.wagihaziz.com
لن أتحدث عن وجيه عزيز بداياته و مشواره و أعماله فكل هذا موجود فى الموقع الخاص به ، الكلام الحقيقى هو ذلك الطريق الذى قام بشقه داخل المملكه الموسيقيه ، فوجيه عزيز من الملحنين القلائل جدا اللذين إنتبهوا إلى الحالات المزاجيه التى تتميز بها المقامات الموسيقيه و ببساطه سنحاول شرح فكرة المقام حتى يسهل الإحساس بتلك الحاله.
إذا تخيلنا أن أمامنا ألة بيانو و وجدنا الأصابع البيضاء و السوداء التى يعبر كل منها عن نغمه مختلفه و قمنا بالضغط على حرف الدو ثم عددنا سبع نغمات بداية منها فهذا هو المقام بمعنى أن المقام يبدأ من النغمه و ينتهى عند جواب نفس النغمه أى الصوت الحاد منها .
و تختلف المقامات بإختلاف الأبعاد بين السبع نغمات حيث أنه بين كل نغمه و أخرى مسافه صوتيه محدده حسب الموجات الصوتيه الصادره عن كل نغمه و فيما يلى أمثله لمقامات و أعمال فنيه من هذه المقامات للشعور بها.
*مقام العجم أو السلم الكبير
يتميز هذا المقام بالبرأه و الدفء الشعورى و من الأعمال التى تنتمى إليه
1-آه لو تعرف نجاة
2-أهواك عبد الحليم حافظ
3-ممكن محمد منير
4-ساب الجنينه للعبد لله
* مقام النهاوند أو السلم الصغير
يتميز هذا المقام بالرقه و الغموض فى أحيان كثيره و من الأعمال التى تنتمى إليه
1-دور يا زمن على الحجار
2-تخونوه عبد الحليم
3-الفرحه محمد منير
و للحديث عن المقامات بقيه فى بوستات أخرى و لكن حتى لا نخرج كثيرا عن موضوعنا فأريد الإشاره و بقوه إلى الحاله التى يستطيع وجيه عزيز إخراجها من كل مقام مع بروزتها و جعلها بمثابة فلسفه و وجهة نظر موازيه و تفوق فى بعض الأحيان وجهة نظر الشاعر و هذا واضح جدا فى أغنية ممكن لمحمد منير و خصوصا فى البدايه (أسكن بيوت الفرح .. آه ممكن ، أسكن بيوت الحزن .. لا يمكن) لاحظوا مدى التعبيريه العاليه حيث إتخذ اللحن شكل البرائه و الصدق كأنما يريد وجيه أن يقول أن هذه هى الحاله التى فطر الله عليها الإنسان ، بدأت هذه الفكره تمتد إلى فلسفة غناء و طريقه مميزه جدا فمن يسمع ألحان لوجيه بصوت أخرين لابد و أن يعرف أن هذا لحن وجيه و هذا واضح جدا فى أعماله الأخيره بداية من أغنية النهايه لفيلم هيستيريا.
فى إعتقادى أن أحمد ذكى لم يغنى بهذه الطريقه قط و هذا يتضح فى طريقة غناء أحمد ذكى فى (أنا مش عاشق ضلمه) إلى الأخر ، و دخول الكورال فى هذا الجزء بمثابة تظاهره ، كما أعتقد أن فكرة دخول الكورال فكرة وجيه عزيز و ليست فكرة عمرو أبو ذكرى عند التوزيع.
تخيلوا معى مظاهره تجوب شوارع المدن و تقول (أنا مش عاشق ضلمه) بلحنها.
و أخيرا أشير إلى الإستيعاب الكامل من قبل وجيه عزيز لكل تراثه المسيحى الغنائى و هذا واضح بشده فى أغنية (فنان فقير)، وهى من مقام الرست و هو المقام الئيس فى الموسيقى العربيه و الذى يتفرع منه مقامات كثيره تحتوى على التلات أرباع التون و قد سبق شرح فكرة التلات أرباع التون فى أول بوست فى المدونه.
فى النهايه بجد إسمعوا وجيه كويس ملحن مهم جدا و وجهة نظر غير مسبوقه فى الموسيقى العربيه.

11 Comments:

Blogger ادم المصري said...

يا فنان

واحشني جدا

وعلي فكرة

بجد كلامك بسيط وسهل

صدقني

انت فعلا فنان

ولو لم تكن فنانا

لوددت ان تكون فنانا

31/10/06  
Blogger مـحـمـد مـفـيـد said...

احييك علي بساطتك وكلامك الجميل واسلوبك الرائع سهل الفهم
وليس بجديد عليك يا فنان

31/10/06  
Blogger saso said...

عارف انا كنت بافكر ازاي اطلب منك ده.. اغنية تحللها مقام وحالة.. او ملحن معين.. كويس انها بدأت بوجية عزيز
حالة لوحده.. علشان انا معرفش مسمي المقام والدرجات كان كل اللي بيوصلني ان وجية لة طابع معين وتيمات حلوة تعرفة منها.. يمكن حتت اورينتال اوي تخليك تقول اةة ده وجية

وانا مش عاشق ضلمة ولا زعلت الضي
مبحبش اداء احمد ذكي بس هنا صوتة نزل لتحت كانة هيبكي ومهما غنيتها هتلقي نفسك بتقولها كده

والعمر فايت بيقول اة
والقطر فايت بيقول تووت
النغمة دي حزينة بطريقة غريبة.. في حاجة اسمها حزن حماسي؟؟
لو في يبقي هيا كده

هيثم بجد ميرسي علي البوست ده

31/10/06  
Blogger meho said...

ايواه يا فنان ....بوست حلو قوى ....وجيه عزيز ليه موسيقى مختلفة
بحب قوى أغنية شوية هموم بتوع كل يوم يلفوا براسى ....
تحياتى ...وربنا يوفقك

1/11/06  
Blogger hesterua said...

رائع يا هيثم
عارف انا اسم المدونة بتاعتى هستريا واسم الميل كده وده نوعا ما لحبى للأحمد ذكى وللغنوة دى
فعلا وجيه من الناس اللى مخدتش حقها
فى غنوة رائعة فى اول تعاون ليه مع منير اللى هى غنوة عصفور...لحنها شبه النوبى رائع بجد
كمان بحب قوى غنوة ..مش كل ما تفتح ايدك تبقى بتحضن بنى ادمين

يا ريت تكتب اكتر عن المقامات والمزيكا
مشتاق قوى اعرف كتير عنها
تحياتى

2/11/06  
Blogger هيثم محفوظ said...

آدم المصرى
ربنا يخليك يا جميل عارف كلامكوا ده بيطمنى قوى على مقدرتى إنى أوصل معلومه موسيقيه أو أخلى اللى قدامى يمسك بإيديه النغم
أشوفك قريب جدا
واحشنىىىىىىىىىىىىىىى
محمد مفيد
واحشنى يا بنى والله أهم حاجه تكون حسيت بالنغم يا عم مفيد و هترجع تحبه من تانى صدقنى النغم ده أصدق حاجه فى الدنيا
saso
شموسه الجميل طبعا فيه نغم فيه حزن حماسى و أقرب دليل على كده أغنية عصفور اللى فكرنى بيها هيستيريا الغنوه دى فى شريط الطول و اللون و الحريه حاولى ترجعيلها تانى و تشوفى وجيه وهو بيلحن من مقام الماجير (العجم) و مطلع من البراءه و الشجن كمية حماس و خصوصا فى الجزء اللى بيقول (راح أغنى و لازمنى أدفى و ابعد حزنى و لكنى بحس إكمنى عاشق لزمانى اللى تاعبنى)
أشوفك قريب
meho
فى البدايه إتشرفت جدا بزيارتك ليه على المدونه أهى شوية همهوم دى دليل مالوش حل يوريك إزاى وجيه بيتناول الشعر شوف عملية التباديل اللى عنلها مع إيمان اللى كانت بتغنى معاه و شوف ده كان تأثيره قد إيه مهم فى الدويتو ده و الدويتو التانى اللى فى نفس الشريط (عندى نفس الإحساس)
سلام يا جميل
hestria
يا باشا متشكر قوى على زيارتك التانيه أنا عارف إنى إتأخرت فى زيارتك
كان أهم حاجه عندى إنى أوضح فى غنوة أحمد زكى فلسفة وجيه فى الغنى اللى ربنا ألهمه بيها من مقدرته على إستخراج حالة كل مقام
أتمنى أشوفك

3/11/06  
Blogger tamer said...

بوست رائع

وكلام معبر


تحياتى

5/11/06  
Blogger tafaseel said...

تسلم يا باشا ع الكلام الروعة ده
انت عارف ان انا كنت جاهل بالراجل ده جدا و لسة بادئ اسمع اغانيه الاسبوع اللي فات و انبسطت جدا من اللي انت كتبته و هو يستاهل اكتر
على فكرة غنوتك حلوة قوى و هزتن حاجات كتير جوايا

5/11/06  
Blogger هيثم محفوظ said...

tamer
شكرا على زيارتك الرقيقه و أتمنى إنك تداوم على الزياره على طول
تشرفت بمعرفتك
tafaseel
حبيبى و زميل الوجع الموسيقى
أنا سمعت غنوتك اللى عنتها سلمى و كلمات أحمد بجد كانت حاجه محترمه قوى و أفكارك جميله و بتاعتك خالص
إحتمال كبير أكون موجود يوم حفلة سلمى و أتمنى اشوفك باى يا علوه

7/11/06  
Blogger sara said...

حضرت حفلة وجيه عزيز في الساقية .. الثلاثاء الماضي ,, كنت اعلم انه رائع .. بعدما قرائت البوست ... علمت انه اكثررر من رائع

30/11/06  
Blogger محمد ياسر said...

اجمل حاجة ان واحد دارس و فاهم فى الموسيقى حلو كده زيك يتكلم عن وجيه بيفهمنا و يعرفنا اكتر

و هو راااائع طبعا

تحياتى

5/12/06  

Post a Comment

<< Home